Tweet
Green card drama
Tambareeeeeeeeeeeeeeennn!!!! Wa a gwaan mi peeps?? Mi deh ya a tek a rough life easy. Bless up to all Tambareen Fambily linky-linky an all Mix Up a Blenda massive. An big up all listeners pon Tambareen Radio ova Mix Up Yaad (mixupyaad.com). Mix up time.
Green Card Drama
People mi deh pon a green card mix-up topic pon me show a farin. One woman meet me an gi mi fi har green card mix-up. She say she nuh fraid fi talk say a nuff tings she did haffi do fi get fi har green card. She say one man did a help har first and it neva work out. Him did like har fren and har fren did a try get him fi married har so she can get har stay. Dem start sort out and him start to ask har fren fi mek him do certain tings to har. Di fren say she naa do dem tings deh an dat if a dem supm deh she haffi do fi get har green card den she will neva get it.
Di woman say afta dat she realise say the man and har fren naa goh work out. Di fren did all stop talk to di man an wen him call di fren tell har fi tell di man say she not there. Di woman say she is not a person fi tek har fren man, but wen she see say har fren did jus a use di man an neva want him, and wen she see say di chance fi get a green card a goh to waste, she just start use har head and start figure out how fi help harself.
flirty, flirty
She say one day she deliberately pass di bar weh di man always deh an act like she surprise fi see him. Den she jus staat smile up flirty, flirty wid him an a ask him where she can find a certain place. Wen di man a gi har directions she jus ask him if him can drop har a di place. Him bite di bait an say yes, an two twos him staat flirt wid har too. She say she ask him weh him a flirt wid har fa an if anyting happen between dem him woulda run go back goh tell har fren. Di man say him woulda neva do dat an before yuh know it di two a dem goh mash a works!!
She an di man de deh a sort out fi a while behind har fren back soh till she ask di man if him can married har fi shi get har green card. Di man say him wi do it. Likkle afta dat, as was expected, di man staat ask har fi do di same tings dem weh him did ask har fren fi do. She say she tell him say she neva do dat yet but she wi try. <span style="font-weight: bold">She tell me bout how it did hot at first but she jus gwaan do it till she get used to it</span>.
She say di man mek she do a whole heap a other freaky tings. Den cut long story short, di man eventually married har an did a go file fi har.<span style="font-weight: bold">But jus before di man do di filing one day him just drop dung dead!! Heart attack [censored] up him nastiniss!! Dis mash up di girl bizniz.</span> But she say bout six weeks afta di man funeral, one a him fren approach har an say him know di whole story bout how him fren did quietly a help har fi she get di green card. Him den say like how him fren dead him wi do it fi har. Soh before john crow coulda fly ova good she run goh married di man fren an him file fi har. Two twos di man tell har say him know wa she used to do wid him fren an how him waan do dem tings deh wid har too. She say she jus do all a di tings dem weh him ask fa ... and more. And eventually she did get har green card.
Har fren now nuh know nuttin bout wa did a gwaan wid di fus man weh she did a sort out wid - tun roun an a congratulate har seh she meet dis man who love har so much dat him married har an mek she get har green card. She all a say she wish di fus man weh dead woulda did jus do di same fi har widout a ask har fi do dem tings deh. Di woman jus respond to har say she nuh wrong har fi nuh waan do dem tings deh wid any man an how if a did she, she wouldn't do dem tings deh eeda!! People unu believe dat??!! She a tell har fren dat, wen she did hide an go do di same tings not only wid di man weh har fren did a sort out, but also di man fren? She evil!! If she did haffi gi satan a sort out fi get di green card she woulda do it dung a hell!!
She say she nuh regret nuttin weh she do, an how she did just a grab good opportunity wen it did come, an how she nuh haffi a worry bout di possibility of being deported, while har fren still a fret an a hide every day.
Weh unu tink? Di one weh get di green card wicked an evil - or she just grab an opportunity weh har fren neva did a goh grab anyway? An weh unu tink bout di fact say she mek di man dem do all dem deh sinting to har jus fi get di green card?
Bwoy of bwoy ... we see people a walk roun every day like dem life jus normal, not knowing di crazy tings weh dem involve inna.
Comment