Bim an Jah gawne a haspital. (Bim a fawda)

[jahlive]

Bim an Jah gawne a haspital……..Bim a Fawda

Bim: JAH, JAH, JAH, JAH Whe di bway dey????

Neutral: Oy bway tap mek up nize roun di place noh yu no si a nite time.. Baxside bway yu si..

Bim: Sarry Neutral but mi wife ready fi hav baby an mi need Jah fi bring mi go a haspital… JAH, JAH, JAH, JAH, WAKE UP BWAY

Neutral: A couldn care if is massa God imself a com dung di road mi sey fi tap di rhatid nize a mi head bway..

Jah: **wipe sleep fram im yeye** Wha wrang wid yu Bim whe yu a bawll out mi name fa??

Bim: Bway baby ready fi com yu haffi tek mi go a haspital..

Jah: **all excited** Mek yu neva sey so bway??? Mi a com..

**Jah run out inna im brief**

Bim: Bway go put on yu dyam pance.. Whe di keys dem?

Jah: Key?? Keys fi wha?

Bim: Yu noh still hav yu bredda cyar bway?

Jah: Bruky tek im cyar bak sah, sey im fine baggy inna im cyar. Bout mi a tek im cyar fi whore house….

Bim: [img]/forums/images/graemlins/mad.gif[/img] Yu si yu an yu dyam whoring ways always a cause contention fi mi yu noh. **Grab Jahlive by di chroat** Whe mi a go do now bway??????? Tell mi no..

Jah: **Choking** Wi cyan go borrow Miss. Merkel dankey cyat dat cyan do..

Bim: **Start shake Jahlive** Dankey cyat??? Dankey cyat yu waa mi fi tek mi wife pan bway. Yu want har lik out mi blows an skirt????

Jah: Like dat dey tuff back gyal neva ride pan dankey cyat before?? Shet up yu dyam moute an com help mi ease di Dulcimeena out before Miss. Merkle hear wi..

Bim: Look whe mi a do pan di day mi pickney a go bawn.. Dis dyam bway hav mi a tieff people dankey..

Jah: Mine im…

**Dankey kick Bim inna im back**

Jah: Too late..

Bim: [img]/forums/images/graemlins/mad.gif[/img] Yu know Jah afta dis done is mi an yu rhatid..

Fern: WAIIIIIIIIIIIIIIIIIIIIIIIIIIIIIIIIIIIIIIIIIIIIIIII IIIIIIIIIIIIIIIIIIIIIIIIIIIIII TEK IE OUT MI SEY, TEK IE OUT WAIIIIIIIIIIIIIIIIIIIIIIIIIIIIIIIIIIIIIIIIIIIIIIII IIIIIIIIIIIII Yu si if dat ben foot bway eva touch mi again…. Whe im dey???

Bim: Gwane in no Jah shi naw go lik yu…

Jah: Yu mad.. Yu betta go get har. Mi wi hole Dulcimena…

Bim: Yu is no dyam fren… Ello mi sweety pie sugga plum.. Mi go get yu a ride fi go a haspital.. A Jah get di ride fi yu so a im yu fi deal wid yu hear.. [img]/forums/images/graemlins/laugh.gif[/img]

Fern: Af all di people whe yu coulda go get a dat Jancrow yu go call??? WAIIIIIIIIIIIIIIIIIIIIIIIIIIIIIIIIIIIIIIIIIIIIIIII IIIIIIIIIIIIIIIIIIIIIIIIIIIIII

Bim: Hole on dey baby Jahlive com tek di bag put pan di cyat bway.. Hurry up di pickney no look like im a go wait..

Jahlive: Arrite.. Evling tega.. Mi mean evling Fern… Whe di bag dey?

Bim: Com bway si it ya pile on mek wi gwane..

**After going about 3 blocks Bim notice he forgot to put Fern on the cart**

Bim: Hell Jah ow yu neva tell mi sey Fern no dey pan di cyart…Tun roun quick man..

Fern: **Taping food holding har cutlass** Bim no mek mi gwane bad tidey yu noh….

Bim: Hush honey………. Jah com help mi hice har up pan di cyart noh..

Jah: Lawd ooman a ow much poundage yu put on so fi one likkle pickney??? Bim shub har up man

Fern: Gwey renking bway. Yu no si is all baby wayte…

Jah: A mussi bout 10 pickney shi a carry roun den

Bim: Shet up bway an help mi wid har..

Venn: Look pan dis no EP.. Yu si ow dem 2 eediat dey hav Fern sprawll aff inna di cyart??/ ~DWL~

EP: ~DWL~ My God Venn mi si.. Wat a site.. ~DWL~ But look pan har face to noh…. Like shi haffi use bawtchroom ~DWL~

**Finally get Fern [pan di cyart Jah pull up Dulcimeena in front a di hasptial**

Jah: Lawd now fi get har out..

Fern: Yu tink mi cyaan hear yu noh.. Yu si if a coulda eva rasie mi foot yu si a gi yu wan dyam kick inna yu moute.. WAIIIIIIIIIIIIIIIIIIIIIIIIIIIIIIIIIIIIIIIIIIIIIIII IIIIIIIIIIIIIIIIIIIIIIIIIIIIII Help mi dear fawda Jeasas… Di Lawd is my shapad I shall nat want…… Our fawda who dey a heben… WAIIIIIIIIIIIIIIIIIIIIIIIIIIIIIIIIIIIIIIIIIIIIIIII IIIIIIIIIIIIIIIIIIIIIIIIIIIIII

Jah: It too late fi prayas now.. ~DWL~

Bim: Whe di dakta dem??? Unnu com quick di baby a com…

King: Si mi ya. Mi a di dakta. Hopen yu legs dem mam..

Fern: Open which legs?? Bway juss move fram mi yu hear..

Nurse JamBrit: Security, security sumaddy please om tek dis mad man outta dis place. **Han Bim 100 farms** Fill dem ya out..

Bim: A so much farm yu haffi full out fi hab pickney.… **Pinting to Jahlive** Yu si dat bway ova dey so. Im a go pay fi everyting.

Nurse JamBrit: Massa tap chat foolishness yu hear. Pay fi wha???. Im couldn pay attention much less.

Bim: ~DWL~ A chroo im look simple but im wi pay fa. Chuss mi…

Nurse JamBrit: Arrite sen im ova ya an gwane chroo wid yu wife…

Jah: Yu sure shi sey shi waa fi go out pan date Bim??

Bim: A so shi sey bawss. Yu hav har salt man gwane chroo. Go chat to har man..

Jah: Arrite sah. Tanks yu hear. Mek a go chat to har likkle.. **Walk up wid big smile** Ello nice lady..

Nurse JamBrit: Hell sir.. So ow yu a go pay fi dis??

Jah: Wat a way yu juss get rite dung to biznizz?? A guess mi cyan com up wid a likkle smalls fi di dinna..

Nurse JamBrit: Bway is whe yu a chat bout. Which dinna dat? Ow yu a go pay fi di pickney..

Jah: foofa pickney dat mam?

Nurse JamBrit: DI DYAM BWAY WHE JUSS LEFF YA!!!! Fi im pickney..

Jah: Who sey mi a pay fi dat? Mi look like mi a hav pickney fi dat baff han gyal???

Nurse JamBrit: Dat lying tongue brute… Dyam jinal yu si.. Security, Security..

Dr. Jazz: Mam please fi tap queeze mi dyam han so hawd before a jook yu wid di neegle ya..

Fern: Sarry dakta mam but a di pain di pain terrible. It a lik mi hawd yu si.. Gi mi sitten fi it noh..

Dr. Jazz: Gi yu sitten??? Mek di pain remine yu fi kip yu dyam foot dem shet nex time….

Fern: WAAAAAAAAAAAAAAAAIIIIIIIIIIIIIIIIIIIIIIIIIIIIIIIII IIII Tek ie out mi sey tek ie out.. **Fling chimmy affa Bim** Yu si yu. Yu dyam mongrel, jancrow crab louse yu.. [img]/forums/images/graemlins/mad.gif[/img]

Dr. Jazz: Hush up yu moute an shub gyal, Di baby a com. Wan lass big shub now.. SHUB

Fern: WAAAAAAAAAAAAAAAAIIIIIIIIIIIIIIIIIIIIIIIIIIIIIIIII IIII

**Baby pap out an Bim faint whe an lik dung di dakta..**

Welcome to Board Lane Mr. Jayden William Duncombe

[sistactry]

Re: Bim an Jah gawne a haspital. (Bim a fawda)

***clap hands,****

bravo Jahlive, well done,

Welcome into de world likkle baby, hang tuff yaa, and listen to you god-daddy Jahlive, dont listen to a word dat u Daddy say, [img]/forums/images/graemlins/laugh.gif[/img]

Congratulations mr & mrs Bimmy,

[neutral]

Re: Bim an Jah gawne a haspital. (Bim a fawda)

jahlive,bwoy mi affi shake mi head [img]/forums/images/graemlins/laugh.gif[/img] [img]/forums/images/graemlins/laugh.gif[/img]
yu mek mi a dead wid laff,mi customers dem a look pon mi,a wanda if mi mad. [img]/forums/images/graemlins/laugh.gif[/img] [img]/forums/images/graemlins/laugh.gif[/img]

[QK13]

Re: Bim an Jah gawne a haspital. (Bim a fawda)

Boy!! The talent we have 'round here!!!
Great work Jahlive....

Outstanding work Mr. & Mrs Bimini and Pickney!!

Welcome to the world (((((Likkle Jayden)))))!! [img]/forums/images/graemlins/laugh.gif[/img]

[yardie fi life]

Re: Bim an Jah gawne a haspital. (Bim a fawda)

way to go guys..this was really good [img]/forums/images/graemlins/smile.gif[/img]

[JamBrit]

Re: Bim an Jah gawne a haspital. (Bim a fawda)

DWL ~ Lawd, mi belly....dis funny nuh hell!!

As usual, great piece of work babes... [img]/forums/images/graemlins/wink.gif[/img] [img]/forums/images/graemlins/smile.gif[/img]

[grandma2]

Re: Bim an Jah gawne a haspital. (Bim a fawda)

thank ((Jahlive)))baby very nice, nice fi see yu was aroun wen yu friend need yu to DWL [img]/forums/images/graemlins/laugh.gif[/img]

[Jazz]

Re: Bim an Jah gawne a haspital. (Bim a fawda)

*DWL* - whooiii - Onlgy Bim pickney an wife coulda gawn ah haspital inna dankey cyaat... Lawd if ah alaugh ah ded...

dem ah dem own bes fren an worse enemy...

Good job Jahlive...

[JamaicanBeauty]

Re: Bim an Jah gawne a haspital. (Bim a fawda)

****jumping up an down clapping mi hans dem******

Nice JahJah, nice!!!!!!!! [img]/forums/images/graemlins/smile.gif[/img]

[MarieK]

Re: Bim an Jah gawne a haspital. (Bim a fawda)

DWL, mi knoa seh di birth of baby Bim neva go so smooth, mi knoa dat dere had to be some drama to di event.

Waiii mi a dead.

[Ensomgirl]

Re: Bim an Jah gawne a haspital. (Bim a fawda)

Bravo!! Bravo!! Jahlive dis is too funny. Mi BOAL wen yuh guh ova to di nurse tinking seh yuh a guh ask har out pon date. [img]/forums/images/graemlins/laugh.gif[/img] [img]/forums/images/graemlins/laugh.gif[/img] [img]/forums/images/graemlins/laugh.gif[/img]

[Jazz]

Re: Bim an Jah gawne a haspital. (Bim a fawda)

den poor Fern nuh si how yuh scan dal har yet??? *DWL*

mi sarry fe yuh wen she reach!!!

[Reggae plus]

Re: Bim an Jah gawne a haspital. (Bim a fawda)

Poor Fern still. [img]/forums/images/graemlins/wink.gif[/img]

Yes Jayden. Welcome little one. [img]/forums/images/graemlins/cool.gif[/img]

[jahlive]

Re: Bim an Jah gawne a haspital. (Bim a fawda)

Thanks everyone. Bway Jazzy as soon as Fern reach a gawne mi gawne.. [img]/forums/images/graemlins/laugh.gif[/img] [img]/forums/images/graemlins/laugh.gif[/img]

[MarieK]

Re: Bim an Jah gawne a haspital. (Bim a fawda)

wandarin to miself if Bim figa out which en a di baby di diaper fi go pan yet?