Story Time - David an Goliath - Yaad style

[msportmore]

Back in di day dere was dis man name Jesse - him faada did name Obed...not to get too much inna people business but yu memba Ruth & Naomi? Well missis, Ruth did married to Boaz and fi dem son was Obed. So when dem tek a stock, come fi find out seh Ruth was Jesse granmadda. Well, Jesse did have some nice young straptin son. Di laas likkle one did name David. Soh Ruth was David great granmadda. What a prekkeh!

Anyhow missis, back in dem days, di Phillistines did a give di Israelites a waam time. An none a dem couldn't stand up to di Philistines cause dem did have wan big giant of a man name Goliath and everybody inna di Israelite camp did fraid a him. When him talk, di Israelite dem tremble inna dem shoes.

So Jesse bigga son dem did inna di army but because him was di laas one, David use to stay an tek care a him faada sheep dem.

Soh one day Jesse tell David seh fi carry some fry dumplin an mackril go gi him bredda dem pan di battlefield. So David feel good bout it now an run carry di food gawn to him bigga bredda dem. But when him reach a di camp, him si everybody face juss look draw. An everybody a fret - so him ask dem a wa happen to dem mek dem face look soh.

Mi soon tell yu wah dem tell him seh...

[msportmore]

Re: Story Time - David an Goliath - Yaad style

My dear mam, David carry di food go gi him bredda dem an everybody siddung unda tree a nyam but nobady a fight - everybody fraid. Soh him ask a wah do dem an wan a him bredda dem tell him fi go look ova di hill. When David look, him si di giant Goliath a bait dem up - an a tell dem fi sen dem baddess man come - hear him nuh - "Any a oonu Israelite bwoy weh feel like seh oonu can come tess di don juss come try - COME TOUCH A BUTTON NUH!!!"

My likkle yout David get bringle! "But a which paat dis dutty bwoy come from a come run him mout afta God people??? Him nuh know seh wi a God bless an who God bless no man can curse!??!" David bredda get bex - "Weh yu nuh goh siddung likkle bwoy! Mi nuh know is weh Daddy sen yu dung yah fa cause all yu do is mek chrobble fi people". David kiss him teet an step pass him big bredd an bawl out "MI WI FIGHT HIM!"

By dis time, di King hear di commotion outside an staat to wonda wah all a di excitement fah. When him hear seh one likkle yout outside seh him willing fi fight Goliath him seh "sen him come mek mi si him". When David go inna Saul tent, Saul naily buss out a laaf - when him si dis likkle maaga bwoy bout him waan goh fight Goliath. But him know seh David haat did trang like lion! So him tell him seh him can gwaan but him ago haffi put on di king armor soh dat him no get too much damage

[msportmore]

Re: Story Time - David an Goliath - Yaad style

Well mi chile, David try awn Saul armor but it did soh big fi him - if yu eva si him likkle head a push out - plus him decide seh him neva use dat deh armor before so him nuh know how good it is. Di king ask him wah him a go use so him staat tell di king seh him trust in di one an ongly true an living God JAH!

So one whole heap a excitement now an everybody a watch cause David run dung di hill an jump ova di gully an a head to Goliath an all a di solja dem stan up a watch. Likkle bit afta dat David pick up 5 smoood smood stone like wah yu wudda use fi chip waata and put dem inna him bag an run to Goliath.

When Goliath si di likkle bwoy him jus buss outta laaf an seh: "Whole awn deh! Mi a wah?? Mi a dawg?? A wah mek oonu a sen dis likkle bwoy wid stick an stone aafta mi? But a wah do dem eediat peeople yah sah?" An him get one good laaf outta it but David neva watch nuh face - him jus a run to di giant said way.

Hear likkle David nuh: "U come to me wit yu armor but I come to u in the name of the LORD and yu head a go back wid mi tiddeh!!"

Den David tek out him likkle bingy and staat twirl it roun him head wid one a di stone dem. When him launch it yu si?? It clap Goliath right inna him farrid! Di poor ting nuh know wah lick him an him dis lan a grung soh BUP! Den David run go ova to him an grab Goliath machete from him waist an him nuh stop saaka saaka soh til Goliath head come awf.

Den him carry di head go gi King Saul. Everybody shock when dem si weh happen an dat day, David was di hero.

[Wendy]

Re: Story Time - David an Goliath - Yaad style

My Kina a stories .. I did write a <span style="font-weight: bold">Samson and Dehliah </span>Yaad Stlye story. Mi wi post it when mi can get to it. Keep it coming

[sistactry]

Re: Story Time - David an Goliath - Yaad style

luvvvv it,

luvvvv it,


come Ms P, come wid de next one~~

tell me bout when David did see Bathesda and like har off~~

or when my boy deh did so hungry and give whey him birthright fe a plate a curry goat~~

[msportmore]

Re: Story Time - David an Bathsheba - Yaad style

Laas week mi siddung unda wan fig tree an mi si wan yout a tear a come up di hill, when mi slow him dung an ask him which paat him a go, him tell mi seh him hear seh di king call him and him so excited.

Well, dat yout was Uriah an di poor ting neva know seh him was running straight into him deat. Dis is di story of David, Bathsheba, Uriah, Samuel and mi mayngi dawg Ruffus.

So one day mi an mi mayngi dawg Ruffus a walk dung di lane - so it was right woun di time when all a di big shot dem usually gawn a war. So mi an Ruffus a walk an as mi bruk di cawna, mi realise which paat mi did deh - me and Ruffus was right cross di street from di palace which paat King David live. Anyhow, mi neva pay dat nuh mine. But den all af a sudden mi hear &quot;pssssstt&quot; &quot;psssssst!!&quot; &quot;nice girl!&quot; Well, when mi look up, a frighten so til a naily dead! Cause guess who mi si perch up pan dem housetime a look ova inna Uriah yaaad!!! Nuh di king!!!! Mi she, mi haat staat race cause mi know she anyhow him ketch mi den a it dat fi me an Ruffus! So mi grab Ruffus an wi go hide roun di cawna an ketch a primps pan weh him did a look pan.

When mi tek a stock a David dat a eyes up Bathsheba (Uriah wife). Truss mi when mi tell yu seh shi did hot man - hot lakka 10 fiya side! An everybody use to wanda how Uriah get such a hot wife like she but everybody know she him was big time solja man an ting soh nuhbady neva too chobble har.

Well, Bathsheba neva pay di King nuh mine when him a call har - mi tink shi did ago ask him if 'im losing air but instead, she jus pick up har towel an cova up an go inside.

Di great king David couldn't sleep man. Him had dat image inna him head of dis hot hot ooman a bade. Soh him sen call one a him servant dem an ask who she. When him hear a who him tell di servant fi bring har come but mek sure carry ar a di back door cause him did married an him wife dem wouldan chop him up if dem did fine out.

Bathsheba get messige seh did king call har an poor ting, shi chouldn't do nutten but go to him - cause shi had was to be obedient to har king..

Mi soon come

[msportmore]

Re: Story Time - David an Bathsheba - Yaad style

so di king call har an wuk har ova - pure daggarin whole night! **BOADWL**

wait, mi haffi fix up dat DWL

[msportmore]

Re: Story Time - David an Bathsheba - Yaad style

So di king call har an shi come een to him - shi did kinda glad because him look good but at di same time, shi did feel bad cause shi love har husband.

So King David sweet har up an ting an gi har likkle Rum an Cream fi relax har an ting - gi har a likkle massage an before yu know it - di 2 a dem end up inna bed!!! Him wake har up inna di wee hours a di mawnin an sen har back home - him did feel good cause him gi har a good work ova.

Anyhow, few months layta guess wah??? BAPSI - KYSI! SHI PREGNANT!!! So shi staat fret cause shi know seh a couldnt har husban pickney cause him did deh a war a fight.

Shi sen message tell David seh shi pregnant and David get nervous an staat wanda weh him ago do.

So me an Ruffus walk go dung di lane an go siddung unda di fig tree juss a chill an si dis yout a tear a come dung di piece - when mi look again, mi si say a Uriah a run a come. When mi ask him weh him a go him say him hear seh di king call him and him was so excited. Poor ting neva know seh him a run straight inna him death!

Well, him head straight to di king house fi si wah di king want - neva even go look pan him wife much less go roun a yaad. When him reach di king, David ask him how di war a go an ting. So Uriah gi di king di report an di king tell him fi gwaan home go wrap up wid di wife likkle bit, fling awn a likkle wuk an jus chill.

Next mawning wen David wake an go outside, a Uriah dat him si a di doorway to di palace. David frighten soh til him naily dead! &quot;Wha yu a do yahso man? Mek yu neva go home to yu wife??&quot; So Uriah seh &quot;Naaah sah! Di whole a mi crew deh pan di bakklefield a fight an mi fi go lay dung eena bed wid ooman? Naah sah! FIYA FI DAT!&quot;

So David tell him say &quot;Alrite, stay yahso til a mawnin den&quot;. An dat evening, David tell Uriah fi come een a di palace come eat wid him an dem nyam curry goat an drink manish waata an red label wine an j/ wray an nephew and drunk awf...David check seh dat wouldan mek Uriah go home to him wife but next mawnin, Uriah sleep same place pan di step.

David realise now seh him haffi go be a likkle more drastic soh David write wan letta gi Uriah an tell him fi go carry di letta back to di field to di captain a di army (Joab)

Well missis, a mi cousin tell mi disyaa paat cause mi neva deh deh but apparantly, aafta Joab read di letta wha come from David, him sen a group a dem go a di hattis paat a di bakkle. Every step dem step a gun shat a lick out. An him put Uriah a di front a di line up - an den him tell di ress a man dem fi drap back.

Mi hear seh Uriah get full up a pure shat an him jus drap dung dead pan di bakklefield....

[msportmore]

Re: Story Time - David an Bathsheba - Yaad style

so di news reach back inna di village faas faas an everybady hear seh Uriah dead. Afta David feel seh Bathsheba mourn long enuff, him sen call har an tell har seh shi fi come live wid him as him wife. So shi move een an ting but memba seh God naah sleep.

God sen him prophet Nathan to David wid a simple message. Hear Nathan to David: &quot;Mi know a rich man weh have dis wan whole heap a goat an cow - an mi know wan neks likkle man - poor, poor - weh jus have one young likkle sheep. Di poor man tek care a di sheep an nurture it sayka a jus di one weh him have. Him treat di sheep like seh a him pickney mi a tell yu!&quot; Well, dis man paas chroo di village an stop a di rich man place and di rich man invite him to dinna - but hear wah di rich man do? Yu tink him tek any a fi him goat an mek curry mutton gi di man wah did a paas chroo? No sah! Him tek di poor man sheep an kill it an him an di travela nyam it fi dinna an laaf bout it wen dem dun. David, weh yu tink fi happen to a man like dat?&quot; Hear David jump up an buss out: &quot;WHAT A WICKED ACT!!! FIYA FI DAH MAN DEH!!! LIGHTENIN AN TUNDA AN BRIMSTONE!!! NO STAR, HIM HAFFI GO PAY BACK DAT! FOUR TIMES OVA!&quot; So Nathan said to him calmly: &quot;A you dweet eenuh breddrin? Imagine look how God tek yu an place yu inna such a high position. An him look afta yu an everyting yu haat desire, him gi it to yu. So y yu tek di man wife an murda di man wife? Why yu dweet David?&quot; When David hear dat him buss out wan piece a bawlin an wailin an repentin. But it was too late.

Di Lord forgive him but di pickney did haffi dead fi sho seh God naah sleep.

Afta dat pickney dead, God blessed David and Bathsheba wid another son and dem call him SOLOMON...some seh him was di wisest man to walk di earth but mi nuh too sure bout dat - cause which wise man would have 700 wife an 300 spoogie pan di side??

But dats anada story fi anada time - BLESS!