We hear sey....Tories fram dung a Kuntry

[Hush Darlin]

Re: We hear sey....Tories fram dung a Kuntry

Shi muss 5 monts missis and mi hear sey ar fadda sey anyhow de bwoy wey breed him dawta noh tan by har him gwine fix im biznin.
Mi ma!!! mi neva benta dung a Mukko yet..mi fraid a dem people dung dey missis ...mi hear bout da madda ooman dey an guess mi wat a noh de teecha gal granny so u kno sey Neville behine gwine prap...jus like wen dem bun wangla and black peppa fe prap smaddy behine if dem poop near smaddy house.
U memba Kahpie the eeidat boy wey always a walk up and dung pan de road..u kno sey im ha waan sore foot right!! well Nerva did tell mi one time sey a Nowheyfah aunty wey name Jaycie did go to da same madda ooman dey dung a Mukko and set guzzo fe geem sore foot caa him use to teef har bingo bag drawz dem offa de line wen she wash demn and heng dem out...she sey nobady coulda leave none a dem baggy pan line an go back go fine ie
Mi hear sey im did ha waan crokus bag wey im store dem eena and sometime him does wear dem...especially de tangs dem

[Chrissy72]

Re: We hear sey....Tories fram dung a Kuntry

Mi ax har wha mek she nuh tell har, but she sey di gyal nuh chat to har, an fram di time when Neville did pramise fi kick har when she Melva an Dulcie did ketch up dung a pipe she nuh biznizz wid nutten whey Dulcie an Neville eena, mi tink she noe dough, but chue she shame she dey gwaan like she nuh noe. But as Melba sey she nuh biznizz widdi, mi nuh biznizz needa, dat a fi dem kekkle a fish.
A so dem gyal dey tan, love have dem eepa pickney, den yuh tink har mah betta, yuh nuh noe sey a 15 a dem she one gat fi 13 diffrant man? yuh tan dey, tap fraw gwaan like a news to yuh. One time sumaddy tell mi sey one gyal an one ah har sista ketch up dung a Miss Merzel shap an di gyal tell har sey she gat one pickney every Mondey mawning [img]/forums/images/graemlins/704555_dwl.gif[/img] if mi whay diddey dem wudda haffi tie mi, mi laff so till mi jrap a grung di day wen mi ere...aye sah.

Lawd a massy, a so Flotto di get im fame fi reel, nuh care a wha time a day, im dey spoat di peeca dawk glass, livin eediat, den yuh neva notice im one red Travel Fox? nuh care a wha kine a cloze im gat awn im inna di red boot, an every time im wawk im look roun an roun pan imself like imma duh di tatty dance [img]/forums/images/graemlins/704555_dwl.gif[/img]
Mi nuh noe di troot to im an di mawkit gate keepa wuk, caw mi ere sey a run dem run im whey wid obya, mi nuh noe a so mi ere peeple sey, caw im didda gwaan like dung a mawkit a feem so dem get ridda him, den feem side addi torey now is dat im cyaa badda wid dung dey an im inna diffrant league yah now, mi want fi noe a wich league dat, caws mi hear sey im didda wawk an tell peeple sey im get wuk a airpoat fi tun security, all now an a whole eepa years dat now, im still dey roun dey bax bread outa dawg mout.

Mi hear sey Miss Leena big son dem did come from Town fi beat him fi pay fidi fone call dem whey im mek an im run whey, no baddy cudden fine im fi one lang time, dem dey bwoy nuh ez eeh, dem teef from even di sick. Miss Leena did get di false foot whey har sista did fi bring fram Englan fi har? Mi hear di suga tek ova di whole a har baddy an dem did cut off di adda foot, a chue? Poor Miss Leena, she wassa nice lady eh nuh, she always call we an gie we neezeberry when we wassa come fram Primary skool, an di neezeberry dem did sweet yuh si, but lightening did strike di tree an killi, mi bex so till, mi hear peeple didda sey a chue di tree dead mek Miss Leena tek dung sick, dem dey setta peeple dey, if dem spread a news pah yuh anybaddy wee tink a chue.

[KeishavKB]

Re: We hear sey....Tories fram dung a Kuntry

unno cyan chat eeh!

[Chrissy72]

Re: We hear sey....Tories fram dung a Kuntry

Originally posted by Rusean (pronounced Russian):
[qb] unno cyan chat eeh! [/qb]

Gewy fraw yah an tap gwaan like yuh nuh noe peeple torey to.
We cyan chat but yuh cyan faws eeh, yuh eena di torey pee pee cluck cluck.

Anyways, how yuh duh girl chile, yuh cook done?

[Hush Darlin]

Re: We hear sey....Tories fram dung a Kuntry

Originally posted by Rusean (pronounced Russian):
[qb] unno cyan chat eeh! [/qb]

u betta mek sure sey u read the whole a it..ie real funny ie si

[KeishavKB]

Re: We hear sey....Tories fram dung a Kuntry

Soon come back... mi a go read an come back.

Cooking? hmmmmm Dinner's production was the husbands affair but wi done eat an a relax fram when.

[Chrissy72]

Re: We hear sey....Tories fram dung a Kuntry

Sweetssop wha mek yuh neva tell mi sey yuh an Neville was tird cousin?

[Hush Darlin]

Re: We hear sey....Tories fram dung a Kuntry

Originally posted by ChRiSsY72:
[qb] Sweetssop wha mek yuh neva tell mi sey yuh an Neville was tird cousin? [/qb]

Cousin whichi paawt.... a lie de ole kin teet tinkin mout bwoy a tell...de closes mi an him come fi bi famblit is one a mi cousin did marrid to oen a him aunty and dem divose bout 6 months afta dem marid
Dem nay ha no pickney needa...mi sey di ooman couldnt cook fe save har life...if she bwile wate ie bunn...wen she try fi wash him clothes dem come out duttia dan before dem wash and as fe de ironin paawt mi sey de man chowziz ha bout fartylebenteen seams and as fe de bed paawt mi nat even a sey nottin caa mi hear sey im tell wan a im fren sey if you push a lag ie wi rroll but dat dey ooman neva kno how fe shake she dis li dung dead so
Mi glad sey mi unkle did ha enuff sense fe come out a dat dey fambily....a Nevill hanty wey name Jessie .....the wan wey a sekritary dun a de PC bank

[Chrissy72]

Re: We hear sey....Tories fram dung a Kuntry

Betta yuh sey im mout tink dan mi, but between mi an yuh, mi ere dranco pich pan him house tap one time wen im did gat one ratten teet inna im mout ...eeeww. Mi ere evry baddy haffi tan up ova di adda side a road fi chat to im, im brett was yucky...lawd...mi ere im put ole nail a fire an dig out di teet peece peece, im is one lucky son-of-a-gun, mi nuh know how im neva pizen ar im neva ketch jermz inna im mout, bout im dey play self dentiss, some peeple too brave man, all now mi cyaa beleeve im did duh dat.
Mi nat even did memba bout dat dey marrij atall dem lucky. Tawkin bout dat yuh antie whey did married to young bwoy, sayka fi falla Neville antie, whey she nayme agen? mi ere peeple sey yuh antie did love young bwoy an did tink sey di bwoy she marrid was giftid inna im pants an chue she wussa play uprite inna church an she did well want fi give up har virginity she tek di bwoy an propose to im, buy ring an plan evryting.
All she cyaa sey nutten to mi eh nuh Sweetssop, ah yuh antie, but mi go tell yuh b'foe yuh face, mi nuh like har one bit, she watch an chat peeple tummuch, a she did bring mi nayme uppa church sey mi did spread lice inna di community, poe mi. A one time mi ketch lice from di rasta bwoy uppa skool, an mi granny did use kerseen ile from outa lamp an tie up mi ed wid peeca white claawt an alla di lice dem did dead, a when mi guh a church di nex week, mi hear how evry baddy ketch lice. Yuh memba Miss Junie likkle suck finga pickney? wen we get break from outa sundey skool di sed day, a she tell mi sey dem dey sey a mi predd di lice, mi bex so till mi hawt full, mi cudden even eat di suck suck an jraps whey mi chuss fraw Miss Inez, trait dung a mi yawd mi guh an tell mi granny, but chue mi granny ah nuh di sumaddy fi trace, mi guh tell mi uncle who did live ova di Govament house which pawt di soljah dem used to camp out, im guh uppa church yuh si gyal, an rip up some dutty torey pan dem, mi shame so till. Pastah did haffi tap preach an guh out dey guh rebuke him, one peeca sinting...mi nuh noe eff yuh noe, but a dat did mek mi tap fraw guh a dat dey church, besides dat, mi neva too too like di peeple dem inna di church needa, dem chat dem one anedda tummuch. Fi yuh same antie one time did ask Panjella effa nuh dat dey frack Miss Junie wear come a church week b'foe laws, mi bex so till, but chue mi wassa pickney mi nuh guh inna di torey, mi mek mi haze deff. Yuh antie tap buy claawt an boot yet? evry Sundey she come a church inna new cloze an have big bill a evry shap an nuh whaa fi pay. Tawkin bout dat, she gat no pickney yet? caw mi did hear peeple wuzza talk sey she a mule, caw she cyaa ha no pickney, but mi nuh noe wha fi beleeve as mi did ere some adda peeple congrigate anda di starraple tree infront a di church pan har nayme how she dash whey belly, dem time mi neva noe wha dem mean, but as mi get olda mi andastan.
Yuh mite a hide dah peeca torey yah, but mi hear Neville used to hide an guh een troo har back doe a nite time afta dem did mash up, dont tell mi yuh neva ere dat...a chue?

[Hush Darlin]

Re: We hear sey....Tories fram dung a Kuntry

mi sey dat ooman bring dung shame apn wi fambily ie see....a noh mi blood relative shi bi u kno...a mi granny fren did ar madda and she dead and mi granny sarry fi har seein dat none a har fambily nay want de respansibility a har and tek har and raize ar
Whichen paawt a har a did virgin u mussi noh know how much man she use to tek eeen through de winda a nite time wen mi uset to go dung a mi granny fi haliday mi use to share room wid har and a nuff time mi hear de bed a shake and the ole spring dem a creak...mi sey she did ha waan ole fat man him use to pant a nd blow like a sey him out a breath and wen ie does a sweet har she does tek the pilla and kibber har mouth das she noh bawl out...good ting sey mi use to sleep pan the kot...
But mi madda did fine out wha a gwaan and she did stap mi fram goin dung a granny go sleep.

Mi did hear de skandal bout the lice tory...and Granny did cuss aff Blance ova it...caa u kno sey fi u granny and fimmi granny dida bess a fren and mi granny nay like how Blanche did tell dem lie pon you...
An a noh Neville alone use to go a har house a nite time mi hears all sometine a 4 or 5 a dem and dem dis run a Duracel pan har....dem sey she ha white livva...ole gal wuckliss ie see...mi glad sey mi and har nay real fambily and mi granny noh want har backa har yaawd.

Den missis u nay hear bout the time wen Mass Crooks ben foot dawta de one wey name Gladys did ha gunnorea and she did geet to Miss Mazel kin teet bwoy and mi hear sey de nexx time im a go dey im mek sure sey him but awwn chree french letta and rub some skatch bannit peppa pon the outside one...Massy mi king de poor gal naily dead..mi hear sey she run go dung ar sista yaawd a bawl out fe Jahnson Baby powda...fe cool ar dung

[yardy]

Re: We hear sey....Tories fram dung a Kuntry

Mi noh beleive seh ie 2 a uunnnooo sidung a chat bout mi cusin Melva,afta yuh Sweetsap puppa breed har aan seh a noh him Wen yuh pa use to com fram markit a use to be de fuss place him tap fi count him change aan gi har big jill a coconut ile wid likkle rice aan suga aan den feel har up Yuh neva noh seh ie tek a wile fi dem figga out seh a him did a fingle de poor ting because shi neva eena har rite sense aan coulden memba seh a Mass Zekel im nyame. Rite now if yuh gu roun a de back mi anty haffe dash weh di wan khiah mattrass wa shi di buy fram Mass Joe dawta wa gawn a farrin. Soh wen yuh aan de wan bang belly Chrissy a spread rumor mek sure seh yuh get de tory propa

[Hush Darlin]

Re: We hear sey....Tories fram dung a Kuntry

Chrissy u did memba Miss Tilda jrunkie jrunkie dawta de wan wey nayme Patsy mi hera sey shi did gi Flotto Flotto gunnorea one time and when him tackle har bout ie she tell him sey a because dem did dweet eena sun hat a dat mek..
Mi hear sey wen him did go a de haspital im tell de dackta dat im have leaks sey him liff up heavy baskit dung a mawkit and ie mek him have leaks...mi sey wen mi hear mi naily dead...mi fren Bev did eena the odda examination room an hear when him tell de dackta so and she buss a big dutty laff and de dackta had to sen har out a door...
Bev sey u shoulda a hera him a chry kanvince de dackta sey a de load wey him liff...aye sah

[Hush Darlin]

Re: We hear sey....Tories fram dung a Kuntry

Originally posted by yardy:
[qb] Mi noh beleive seh ie 2 a uunnnooo sidung a chat bout mi cusin Melva,afta yuh Sweetsap puppa breed har aan seh a noh him Wen yuh pa use to com fram markit a use to be de fuss place him tap fi count him change aan gi har big jill a coconut ile wid likkle rice aan suga aan den feel har up Yuh neva noh seh ie tek a wile fi dem figga out seh a him did a fingle de poor ting because shi neva eena har rite sense aan coulden memba seh a Mass Zekel im nyame. Rite now if yuh gu roun a de back mi anty haffe dash weh di wan khiah mattrass wa shi di buy fram Mass Joe dawta wa gawn a farrin. Soh wen yuh aan de wan bang belly Chrissy a spread rumor mek sure seh yuh get de tory propa [/qb]

mi sey deaf eays mek people tell lie and in dis yah cahe bline eye mek people tell lie caa a diffrant set a people u dey chat bout wi noh kno dem dey people wey u dey tawk bout

[Chrissy72]

Re: We hear sey....Tories fram dung a Kuntry

Originally posted by Sweetssop:
[qb] mi sey deaf eays mek people tell lie and in dis yah cahe bline eye mek people tell lie caa a diffrant set a people u dey chat bout wi noh kno dem dey people wey u dey tawk bout [/qb]

A who she Sweetssop, a who fah pickney she be, a nuh she come fraw ova Barracks?
A muss di rang setta peeple dem she dey tawk fi chue caw mi nuh noe har, a so peeple dead an nuh noe wha dem dead fah. She betta galang guh mine har biznizz.

[Chrissy72]

Re: We hear sey....Tories fram dung a Kuntry

Eff yuh neva tell mi now sey a nuh yuh blood fambly mi wudden noe eh nuh, caw mi always ere yuh granny sey a nuh so she raise none a har pickney ar gran pickney, mi swear she was har blood...but now mi noe, effa chue yuh dey tawk. Effa laff a pap up, mi noe di big belly man whey she used to dey wid, we used to call im Blanch suga daddy, an Blanchie boops, one day mi si di man bodout shut, im gut so big das im nayble dey anda im chin, eff yuh tink a lie mi dey tell, mi swear ***spit pon finga an point to di sky***
Yuh si yuh granny dey, mose addi torey whey my granny ere a she bring dem come dung a mi yawd, yuh si wen dem two ole ooman dey lap dem frack tail an sidung outa di ole kitchin pan di bamboo seat whey mi mad uncle bill, dem comb troo evry baddy torey wid fine teet comb, dem nuh miss out nutten narr no bady.
A fi yuh granny fuss mi ere wid di gunnorea torey, poe mi tink a gun Gladys gie Buffy, yuh memba a so we did use to call di bwoy caws im teet dem did buff outa im ed, dem used to chubble im an sey im teet dem dey pan im lip. Lawd a massy, mi used to love gwaan like mi dey play wid mi dally tings dem an dey lissen di two ole ooman dem chat, natta villige lawya nuh noe peeple torey like yuh granny. Mi baffle ova di gunnorea torey so till mi ere fimi granny now sey how she see Buffy dunga clinic fi guh si di nerse fi get some purple an green capsull fi clear up di gunnorea...dat did soun nasty yuh si, das why anytime mi go gie one likkle peece mi mek sure sey mi gat one french letta, an if mi nuh gat none, mi rung guh buy one kisko pop an eat eh faws faws an use di kisko bag, caw mi nuh want fi ketch nutten, werse like ow mi granny did tink mi wassa virgin till mi a 18, poe she nuh noe wha used to gwaan roun a back arr when she gawn a bush gaw gie grampa lunch. But mi nuh fool fool, mi mek sure mi tell di bwoy dem sey eff dem mek one werd fly outa dem mout mi mek mi uncle chop dem up, poe bwoy dem ketch dem fraid, caw dem noe mi uncle wussa mad man.